കോഴിക്കോട്: ബലാത്സംഗക്കേസ് പ്രതി രാഹുല്‍ മാങ്കൂട്ടത്തില്‍ എംഎല്‍എയ്ക്ക് സൈബര്‍ ഇടങ്ങളില്‍ ലഭിക്കുന്ന പിന്തുണ തള്ളി മുതിര്‍ന്ന കോണ്‍ഗ്രസ് നേതാവ് രമേശ് ചെന്നിത്തല. രാഹുല്‍ മാങ്കൂട്ടത്തിലിനെ കോണ്‍ഗ്രസുകാര്‍ പിന്തുണയ്ക്കരുതെന്നും നേതൃത്വത്തിന്റെ പിന്തുണയില്ലെന്നും രമേശ് ചെന്നിത്തല പറഞ്ഞു.
'സൈബര്‍ ഇടങ്ങളിലെ പിന്തുണ എങ്ങനെയാണെന്ന് എല്ലാവര്‍ക്കും അറിയാമല്ലോ? അതിന് വലിയപാടൊന്നുമില്ലല്ലോ. ഇന്ന് ജനങ്ങള്‍ക്കിടയില്‍ പ്രവര്‍ത്തിക്കുന്നതിനേക്കാള്‍ നല്ലത് സോഷ്യല്‍മീഡിയയില്‍ പ്രവര്‍ത്തിക്കുന്നതാണെന്ന തെറ്റിദ്ധാരണ എവിടെയോ ഉണ്ട്', രമേശ് ചെന്നിത്തല പറഞ്ഞു.
ചെറുപ്പക്കാരായ പൊതുപ്രവര്‍ത്തകര്‍ ജനങ്ങളുമായി ഇടപെടുമ്പോള്‍ തികച്ചും ജാഗ്രത പാലിക്കണം. പൊതുപ്രവര്‍ത്തകര്‍ മോഡലുകളാണ്. മാതൃകയായിരിക്കണം എന്നും രമേശ് ചെന്നിത്തല റിപ്പോര്‍ട്ടറിനോട് പറഞ്ഞു.
രാഹുല്‍ മാങ്കൂട്ടത്തില്‍ കോണ്‍ഗ്രസ് സ്ഥാനാര്‍ത്ഥികള്‍ക്കുവേണ്ടി പ്രചാരണത്തില്‍ ഇറങ്ങേണ്ടതില്ലെന്ന് കെ മുരളീധരനും പറഞ്ഞു. രാഹുലിനെ ഒരു പരിപാടിയിലും കയറ്റേണ്ടതില്ലായെന്ന് പറഞ്ഞതാണെന്നും ഉദിച്ചുയരേണ്ട താരങ്ങള്‍ ഉദിക്കും, അല്ലാത്തത് അസ്തമിക്കുമെന്നുമടക്കം രൂക്ഷ പ്രതികരണമാണ് കെ മുരളീധരന്‍ നടത്തിയത്.
'കോണ്‍ഗ്രസില്‍ ഇപ്പോള്‍ പാര്‍ട്ടിയിലുള്ള എംഎല്‍എമാര്‍ ആരും ഒളിവിലല്ല. എല്ലാവരും ഫീല്‍ഡിലുണ്ട്. പാര്‍ട്ടിയിലില്ലാത്ത ഞങ്ങള്‍ മാറ്റിനിര്‍ത്തിയ ആരെങ്കിലും ഒളിവിലുണ്ടെങ്കില്‍ കണ്ടുപിടിക്കേണ്ടത് പൊലീസാണ്' എന്നും കെ മുരളീധരന്‍ പറഞ്ഞു. സ്വന്തം നിലയ്ക്കാണ് രാഹുല്‍ തെരഞ്ഞെടുപ്പ് പ്രചാരണത്തിന് ഇറങ്ങിയത്. ഇനി അങ്ങോട്ട് കയറ്റേണ്ടെന്ന് പറഞ്ഞിട്ടുമുണ്ട് പാര്‍ട്ടി. സസ്‌പെന്‍ഷന്‍ നടപടി നേരിടുന്ന ആളുടെ നടപടിയില്‍ പാര്‍ട്ടിക്ക് ഉത്തരവാദിത്തം ഇല്ല. വേണ്ട താരങ്ങള്‍ ഉദിച്ചുവരും. അല്ലാത്തത് അസ്തമിക്കും', മുരളീധരന്‍ വ്യക്തമാക്കി.
Content Highlights: Young public servants should be cautious when interacting with the public Said Rahul Mamkootathil